Qralê Erebîstanê Sêûdî vengdayîş bi welatanê Ereban ê Kendawe kerd ke vera ‘çalakîyanê krîmînalî’yê Îranî bikewê mîyanê têgêrayîşî. Tehran zî cewab da û rîyê waştişê ‘parçekerdişê herême’ ra Rîyad sûcdar kerd.
Wezaretê Karanê Teberî yê Îranî, cewabêko wişk da vengdayîşê Erebîstanê Seûdî yo ke di kombîyayîşanê berzan ê Mekkeyî de vengdayîş bi welatanê Ereban kerdibi. Îranî rîyê waştişê ‘parçekerdişê herême’ ra Rîyad sûcdar kerd. Vervatoxê Wezaretê Karanê Teberî Abbas Mûsavî seba Seûdî vat, “Hîna zî cehd kenê ke mîyanê welatanê Muslumanan û herême de parçekerdişan dewam bikerê; no zî waştişê rejîmê sîyonîstan (Îsraîl) o."
Hîrê kombîyayîşê berz ê vera Îranî
Mekke de mabênê Erebîstanê Seûdî, îttîfaqanê ci yê kendawe û welatanê Ereban de hîrê kombîyayîşî ameyî viraştene. Qralê Seûdî Salmanî di kombîyayîşanê destpêkî de qisey kerd û reqîbê xo yê Şîa Îranî kerd hedef. Dimayê her di kombîyayîşanê berzan, tewr peynîye de Rêxistina Hemkarîya Îslamî kombîyayîşêk viraşt. Nê kombîyayîşan de amanc o bi ke welatanê herême vera Îranê bikewê mîyanê têgêrayîşî. Yekane welato ke paştdayîş da Îranî Iraq bi. Rayberîya Iraqî netîcenameya kombîyayîşê berzî yê Yewîya Ereban tesdîq nêkerde.
