Bi xîretanê Rûsya roja şemeyî mabênê Armenîstan û Azerbaycanî de adirbirnayîş amebi kerdene la adirbirnayîşî 5 deqayan dewam kerd. Mabênê wird welatan de şer dewam kerd. Artêşa Azerbaycanî zî reya verêne eşkera kerd ke înan sîstemêkê fuzeyan ê Armenîstanî ro bombayî eştî.

Wezaretê Pawitişî yê Armenîstanî hêriş raşt kerd labelê derheqê îdîaya ke vana fuzeyî dîyenê warê sivîlî yê Azerbeycanî ro' red kerde. Wezaretî ard ziwan ke nê hêrişî ra dima heqê Armenîstanî esto ke bido pêro waranê leşkerîyan ê Azerbaycanî ro.

Goreyê doneyanê fermîyan şerê Karabagî de heta nika tewr tay 600 kesî merdî la bîlançoya raştikêne giranêr a. Her wird terefî zî îdîa kenê ke bi hezaran leşkerî kiştê. Azerbaycan hûmara leşkeran ê merdeyan nimneno têna hûmara sivîlan eşkera keno.