Paytext Bexdadî de hîrê cayan de teqayîşî ameyî meydan. Kerkûkî de tay cayanê krîtîkan de newe ra tevgêrayîşê DAÎŞî dest pêkerd. Rîsipîyan û rayberanê êşiran seba şerê xomîyanî hişyarî kerdî.

Teqayîşanê Bexdadî de 6 kesî merdî û 11 kesî zî birîndar bîyî. Kerkûk, Xurmatu, Xaneqîn, Dîyala, Anbar, Musul û Selahaddînî yê ke cayê krîtîkî yê de tevgêrayîşê DAÎŞî newe ra dest pêkerd.Hêzanê Iraqî herêmanê Kerkûkî û Selahaddînî yê ke DAÎŞ tede newe ra aktîf beno de operasyonî kerdî. Fermandarê operasyonan Saad Harbîyeyî vat ke yeno pawitene ke operasyonî hîrê rojî dewam bikê. Harbîyeyî vat ke Hêzê Hewayî yê Iraqî zî paştî danê operasyonan.

Herêma Dolî Kerhe ya Kerkûkî de operasyonêk ame kerdene. Çarçewa operasyonî de 6 DAÎŞijî ameyî kiştene. DAÎŞî bi hêrişê Xaneqinî cewabê operasyonî da. Hêrişî de 3 leşkerî û sivîlêkî merdî. Rîsipîyan û rayberanê êşiran ê ke nawnayîşan û tevgêrayîşê DAÎŞî ra qerqilîyenê Rayberê Şîîyan Alî Sîstanî hişyar kerd ke beno ke Iraqî de şerê xomîyanî do vejîyo. Rîsipîyan û rayberanê êşiran Sîstanî ra waşt ke vera nawnayîşanê gonîyênan û grûbanê mîlîs û mafyayan înîsîyatîf bigêro. Rîsipîyan û rayberanê êşiran îfade kerd ke ê seba têkoşînê vera partîyanê ke derheqê înan de şikî estî û grûbanê çekdaran amade yê.