Burkîna Faso de hêriş: 35 sivîlî, 7 leşkerî, 80 cîhadîstî merdî

Herêma Arbinda ya Vakurê Burkîna Faso de hêrişanê vera yewînêka leşkerî de bi desan kesî merdî.

Goreyê eşkerayîya Serekatîya Fermandarîya Pêroyîye sêşeme serê siba ''Hûmarêka zêde ya terorîstan Arbinda de bi hawayêkê hemdemî hêrişê leşkeran û sivîlan kerd."

Artêşa Burkîna Faso pare kerd ke netîceyê şerî de ke bi saetan dewam kerd '80 terorîstî' ameyî kiştene û 4 leşkerî, 3 cendirmeyîmerdî û qasê 20 leşkerî û cendirmeyî zî birîndar bîyî. Serekkomar Roch Marc Chrîstîan Karboreyî da zanayene ke hêriş de 35 sivîlan wefat kerd. Goreyê Fermnadarîya Pêroyîye nêzdîyê 100 motorsîkletî, zaf çekî û fîşekî ameyî destvistene û netîceyê şerî de 'terorîstî neçare mendî' ke xo tepîya biancî.

Burkîno Faso sînorê Malî û Nîjerî de yo ke tede cerganê El Qaîde û DAÎŞî aktîf ê. Serra 2015î ra nata hêrişê cergan zêde bîyî. Goreyê Neteweyanê Yewbîyayeyan serra 2015î ra nata 700 kesan ra zêdêr kesî ameyî kiştene û tewr tay 560 hezar merdimî zî neçare mendî ke warê xo caverdê.