Pancşemeyê vîyarteyî de keyepelê Spîegel Onlîne daybi zanayene ke Almanya wazena paştdayîş bida ‘herêma biasayîşe’ ya ke DYE wazeno Rojawanî de awan bikero. Der Spîegelî dabi zanayene, plan seba ke hêzanê Kurdan Tirkîya û rejîmê Şamî ra bipawê yeno amadekerdene. Keyepelî bale ante serê teyareyanê Tornadoyî yê ke seba têkoşînê vera DAÎŞ’î Urdun de ameybî cakerdene û teba eskeranê Almanya yê ke nê planî de do ca bigêrê.

Wezaretê Karanê Teberî yê DYE Mîke Pompeoyî roja Îne de Berlîn de zî tayê kombîyayîşî kerdîbî û nê kombîyayîşan de zî na mesela amebî rojdem. Yewîya Demokratîkî ya Xirîstîyanan (CDU) a ke partîya Serekwezîre Merkel a, zerederdin nêzdîyê nê planî bena.

Rottgen: Ganî Almanya berpirsîyarîye bigêro

Norbert Rottgeno ke Meclîsê Federalî de karanê teberî ra berpirsîyar o, da zanayene ke ganî wezîfeyê eskeran ê ke vera DAÎŞ’î têkoşîn kenê bêro dergkerdene. Rottgenî rojnameyê Augsbûrger Allgemenîeyî rê qisey kerd û vat ke, “Ma qalê herêmêka winayêne kenê ke Kurd û şarê bînê ke herême de ciwîyenê do bêrê pawitene. Seba ke şarê herême bêrê pawitene û vernîya şeran bêra girewtene ganî Almanaya berpirsîyarîye bigêro.”

DYE seba ‘herêma biasayîşe’ ya Rojawanî, wazeno Almanya teba 280 eskerî û 6 teyareyanê ci yê Tornadoyî yê teyaregehê Al-Asrakyî yê ke Urdun de ca kerdê tewrê nê planî biba. Dimayo ke QSD’yî DAÎŞ bin kerd, ame zanayene ke tezkereya seba hêzanê eskeran a ke Urdinî de yê, nêna dergkerdene.