Cergê DAÎŞî ke bin kewtibî hêrişê dewleta tirke yê vera Rojawanî ra dima newe ra bihêz bîyî.

Wextanê peyênan de bi taybetî herêmanê Başûrê Kurdîstanî de menga teşrîna verêne ra nata hêrişê DAÎŞî bîyî zêde. DAÎŞî menganê kanûne û teşrîna peyêne de Musul, Tel Afer, Anbar, Kerkuk, Dîyala, Xaneqîn, Germîyan de zaf hêrişî kerdî.Cerganê DAÎŞî şewa şemeyî hêrişê qezaya Sadîye ya Dîyala û qezaya Beycî ya Selahadînî kerd.

Hêrişêk de noqtayê polîsan ame hedefkerdene. Ame îdîakerdene ke bombayêka ganîye hema ke nêresa hedefê xo seba ke polîsî pê hesîyayî xo teqna. Dima pêkewtiş vejîya û pêkewtiş de 4 polîsê federalî yê Iraqî merdî û zaf kesî birîndar bîyî. Ame parekerdene ke pêkewtiş de zaf DAÎŞijî zî merdî.

Cerganê DAÎŞî heman şewe hêrişê noqtayêkê Haşdî Şabîyî yê Dîyala zî kerd. Nê herişî de zî endamêkê Haşdî Şabîyî merd û 3ê înan birîndar bîyî. Hewteyê vîyarteyî de artêşa Iraqî vera DAÎŞî herêma Kîfrî ya Germîyan de operasyonî dabi destpêkerdene. Operasyonî Musul de ameyî zêdekerdene û hucreyêkê DAÎŞî ame îmhakerdene.