Bi tewrbîyayîşê nêzdîyê 40 wendekaran 1’ê Nîsane de Unîversîteya Tokyo de dersanê Kurdkî dest pêkerd. Dersê ke hetê Vakkas Çolako ke Endamê Banderîya Unîversîteya Cigêrayîşanê Beyaxkî ya Tokyoyî ra yenê dayene, wendekarê ke tewrê dersan benê zafêrîyê ci Japon ê.

Unîversîte de, dersê Kurdkî kewtî mîyanê dersanê ke tewr zêde yenê weçînayene. Japonan reyde Çîn û Taywanijê ke unîversîte de wanenê zî dersanê Kurdkî weçînenê.

Dimayo ke unîversîte de dersê Kurdî dest pêkerdî, Wezaretê Karanê Teberî yê Tirkî seba astengkerdişê dersan kewt mîyanê têgêrayîşî. Perwerdekar Çolakî ard ziwan ke dersê Kurdkî seba Akademîyê Japonya gamêka muhîm a û da zanayene, Dewleta Tirkî nê cehdkerdişan ra nêeşkena netîce bigêra.

Çolakî da zanayene, o çimeyanê Wezaretê Karanê Teberî yê Japonya ra pêhesîyo ke Dewleta Tirkî seba astengkerdişê dersan kewta mîyanê têgêrayîşî û ard ziwan ke na babete binê asayîşê bingeyênî yê Japonya de ya û bawer kena ke wezaret cewabo ke paweno dano Wezaretê Tirkî. Çolakî da zanayene ke dersî do wextêko derg dewam bikerê.