Serekkomarê Sûdanî Omer El Beşîro ku serra 1989’î ra nata îqtîdar de yo, îstîfa kerd. Televîzyonê neteweye da zanayene ke artêşe kena ke eşkerayîyêka muhîme bida û yewîyê eskerîye serê pirdê Nîlî û serê  pirdanê Hartûmî yê paytextî de cayanê stratejîkan de kerdê ca.

Seba awankerdişê hukmatê vîyarteyî munaqeşeyî yenê kerdene û bi des hezaran kesî zî vejîyayî kuçeyan. Girse bi tabetî vernîya Wezaretê Pawitişî de çalakîya roniştişî virazeno û wazenê artêşe leyê şarî de ca bigîro.

Çimeyanê ke Reûtersî rê qisey kerdo da zanaye ke Omer El Beşîr û der û dorê ci qesra serekkomarîye de, hepisê keyeyî de yenê girewtene.

19’ê Kanûne de seba ke  bahaya nanî hîrê qatî zêde bibî Sûdan de tenganeyê ekonomîyan ê bînan reyde numayîşê protestoyan dest pêkerd û  wextêko kilm de vera rejîmê Omer El Beşîrî de bedilîyabi têgêrayîşêk.

Omer El Beşîro ke serra 1989 de bi derbeye welat kerdibi xo dest, serra 2010 ra nata hetê Mehkemeya Cezayan a Mîyanneteweyî bi sûcanê qirkerdişî û sûcanê vera merdimîye yeno sûcdarkerdene. Omer El Beşîr serra 2015 de bi nisbetê se ra 94,5 ame weçînayene. Eynî wext de sûcdayêka bîn a serê Beşîr zî a ya ke 9 mîlyon dolar kerdo tûnika xo.

Dostê Erdoganî yo dîktator

Omer El Beşîr dostê Erdoganî yo. Rixmê derheqê ci de qerarê girewtişî yê mîyanneteweyî bibo zî, Omer El Beşîr amebî zîyaretê Tirkîya û  seba Erdoganî vatibi ‘Muslumanêko baş bi.’

Erdogan zî seba El Beşîrî vatibi ke, “Muslumanêk nêeşkeno qirkerdiş bikero” û paşte dabî El Beşîrî.

Koalîsyonê Mahkemeya Cezayan a Mîyanneteweyî (ÛCMK) daybi zanaye ke hêza Musluman  a ke hukmat paşte dano înan, tewr kêmî 200 hezar sîvîlî kîştî û tecawuzê sîstematîkî kerdî û bi mîlyonan kes koçber kerd.