Rûhanîyî qerarê DYA yê hemverê Muhfizanê Şorişî yê Îranî şermezar kerd, vat roja ke Muhafizê Şorişî, artêşa îdeolojîke ya Komara Îranî awan bîya ra nata “mucadeleyê hemverê terorîzmî dayo.” Rûhanîyî DYA sey “serê terorîzmê mîyanneteweyî” bi name kerd.

Serekê DYA Donald Trûmpî roja Dişemeyî bi eşkerayîyêk pêhesna ke Muhafizê Şorişî mîyanê lîsteya “organîzasyonê terorîstî” de ameyo bicakerdene.

Trûmpî vat, reya ewilêne ya organîzasyonêk ke pabesteyê hukmatêkê xerîbî yo bi nê hawayî yeno namekerdene. Serekê DYA heman wextî de vat no tedbîr do bibo sebeb ke zextê serê Îranî bêrê zêdekerdene.

Trûmpî eşkerayîyêka nûştekîye daye û vat no qerar, “Ne ke tena vano Îran sey welatêk paştî dano terorîzmî, goreyê nê qerarî Muhafizê Şorişî bi çalakîyan paştî danê terorîzmî, finanse kene û teşwîq kene.” Trûmpî wina dewam kerd, “Eke şima Muhafizê Şorişî dir bixebetîyê şima terorî finanse kenê.”

Goreyê Koordînatorê Mucadeleyê Hemverê Terorî yê Amerîka her paştdayîşêko madî yê Muhafizanê Şorişî do sey “sûcêko federal” bêro ercnayene.

Hêzo elît ê Muhafizê Şorişî Hêzê Qûdsî zî mîyanê çarçewaya pênaseyî ya ke nameyê ci ravêrena de ca gêna. Hêzê Qûdsî ke perê teberî yê Muhafizê Şorişî yê, xusûsen paştî danê tîfaqanê Îranî yê Rojakewtena Mîyanêne. Serê înan de zî rejîmê Beşar El Esadî û Hîzbûllahê Lubnanî estê.