Ajansê Xeberan ê Mîyanneteweyî yê Fînlandîya pare kerdibi ke Wezaretê Karanê Teberî yê Fînlandîya seba ke cinî û domanê DAÎŞijî nimitkî yenê Fînlandîya planêk kerd. Na xebere ra Fînlandîya de muneqeşayê pîlî yenê kerdene.

Dokumentêko ke 21ê teşrîna peyêne de ame destvistene  de yeno eşkerakerdene ke doman û cinîyê DAÎŞijî bi teyarayêkê taybetî yenê berdene bi Fînlandîya. Wezîrê Karanê Teberî Pekka Haavîsto wazeno ke cinîyî û domanî bêrê ardene bi Fînlandîya la Wezîrê Fînansî Katrî Kulmînî îfade kerd ke krîzê asayîşî ra sebeb ganî ê nêrê ardene.

4 Partîyanê Muxalefetî Persnameyêko Hempar Da

Demokratanê Xîristîyanan, Nika Têgêrayîş, Partîya Komelê Neteweyî zî fikrê xo yê hempar vila kerd û waşt ke na mesele wa parlamento de bêra muneqeşakerdene. Serekê Partîya Fînlandîyayîjan Rastîn Jussî Halla Ahoyî vat ke ardişê doman û cinîyan berpirsîyarîya Fînlandîya de nîyo. Hallo Ahoyî vat: "Eke nê doman û cinîyî bêrê tîya, ê do xebatanê terorî dewam bikê."

Serekwezîre Sanna Marîn zî çend rojî verê cû dabi zanayene ke ardişê hemwelatijanê Fînlandîya yê Kampa Holî de birêka hukmatî çin a. 

Kampa Holî de 11 cinîyî û 30 domanê fînlandîyayîjî estê.

Hemserekê Konseya Karanê Teberî ya Kantonê Cizîrî Abdulkerîm Omerî zî hewteyê vîyarteyî de eşkerayîyêke dabî Yle û vatbi ke ê do destûr nêdê ke domanî dadîyanê xo ra bêrê girewtene.