Emmanûel Macron serdana Belgradî ya paytextê Sirbistanî de eşkerayî daye û vat ke seba pawitişê peymana nukleere û qedînayîşê alozîya herême do Trump, Rûhanî û Pûtînî dir bicemêyo.

Serekkomarê Fransa vat: “Nê teşebusê ma, meterîsê Ewropa de ziwanêko newe awan kerdo û Amerîkayijan dir rayîrê ver bi dîyalogêkê bisebirî akerdo.”

Macronî vat: “Nê şertanê zehmetan de ma do qasidî û muzakerekarîya xo bidomnê. Gama ez agêraya Fransa sere waştişê Rûhanîyî ra ez do ê dir qisey bikerî. Dima ra ez do nê hewteyî de Pûtîn û Trumpî dir zî qisey bikerî.”

Macron ano ziwan ke o seba alozîya herême vindarno, na xebate keno.

DYA Gulan a 2018’î de xo peymana nukleerî ra antibi. Tehran zî welatanê Ewropa rê zextan keno ke mueyîdeyanê DAY pûç kerê û sozê xo bica bîyarê. Tehranî tewr peynî de eşkera kerdibi ke înan nisbetê zengînkerdişê ûranyûmî veto serê 3.67’î.

Îdareyê Tehranî wazeno aborîya Îranî zextanê DYA ra bipawo û naye ra zî zextanê xo kena vêşî. Roja Dişemeyî Wezaretê Karanê Teberî veng da îmzakaranê welatanê Ewropa ke wa tedbîranê pratîkan, bitesîran bigêrê û bi mesuldarî tê bigêrê.