Wezîrê Karanê Ewrop yê Fransa Clement Beauneyî Senato de qisey kerd û vat: ''Hacetê ambargoyê muxtemelî zî tede ma do tedaya Ewropa bikerê ke tedbîranê xo wa xurt bikera.''

Beauneyî vat: '' Erdogan sînoranê xo her roje binpay keno. Heqaretê ey ê seba Macronî û provakasyonê ci yê vera Fransa raştîye mojnenê ra. Erdogan her tim heman çi armanc keno; cîrananê xo rê bi taybetî Yewîya Ewropa rê asta tewr berze de tedayan bikero. Ma wextêkê dergî vera naye bêveng û hîsger mendî.''
 

Hêrişê peyênî yê dewleta tirke yê vera Fransa hema ke Sûrîye, Lîbya, Dengizê Sipî û Kafkasya de alozîye dewam kenê qewimîyayî.

Teşrîna peyêne de kombîyayîşê berzî yê Ewropa de Bruksel de Tirkîya ra ame waştene eke Dengizê Sipî de peynîya cigêrayîşê gazî bîyara û kombîyayîş de Tirkîya rê hîşyarîya peyêne dîyaye. Kombîyayîşê bînî de rojdem do bibo ambargoyê vera Tirkîya.

DYA zî dima ke dewleta tirke sîstemê pawitişê hewayî yê Rûsya S-400 ceribna, gef wendbi.