Rayberê Têgêrayîşê Rayîrê Roşnîye û nameyanê sembolan ê têgêrayîşê şorişgêrî yê Peruyî ra Abimael Guzmanî dinyaya xo bedilnaye.

Profesorê Felsefeyî Guzmano ke sey Serek Gonzalo yeno zanayene xebara mergê ci hetê selahîyetdaranê Peruyî ra twîtter de ameye parekerdene. Guzmano ke rojanê peyênan de rewşa ci giran bîyebî 1992î ra nata zîndan de bi.

Guzmanî unîversîte de marksîzmî rê bi eleqedar û 1962 de bi profesorê felsefeyî.  1965 de hela ke Çîn zîyaret kerd raybero komînîst Mao Zedongyî ra îlham girewt û 1969 de pîya bi 11 embazanê xo yê akademîsyenan Rayîro Roşnîye (Sendero Luminoso) na ro. Armancê ci o bi ke semedê dewletêka komînîste şerê şarî bido destpêkerdene.  Grûba ke pabesteyê Partîya Komînîste ya Peruyî bî sere de têkoşîno biçeke nêkerd. 1980î ra dima rewşe bedilyaye.  Çalakîye pîlî ameyî kerdene. Prosesê têkoşînê biçeke de 60 hezarî ra zafêr kesan cuya xo vînî kerde. 1992 de gama ke Guzman hetê îstîxbaratê Peruyî ra ame tepiştene serewedaritiş qedîya. Guzman 1993 de vejîya televîzyon û veng da ke wa semedê haştîye şer bêro kerdene. Dima ra 6.000 endamê Rayîro Roşnîye programê êfu yê hukmatî de teslîm bîyî. 2006 de cezaya muebetî dîyaye Guzmanî û Lima de zîndanê ke dengizî de hucre de ame cakerdene. 2010 de hemrayêka xo de zewijya. Seba ke rewşa Guzmanî bibe xirabe aşma temmuze de wedarîya bi nêweşxane.