Goreyê îdîaya Keyeyê Pawitişî yê Heqanê Merdiman ê Surîye, bombardumanê Îsraîlî de herêma Şamî û başurê welatî de bajarê Suveyda de tayê mewzîyî hedef ameyê girewtene. Goreyê keyeyê Pawitişî hêrişan de 2 yê xo Surîyeyijî, 11 kesî ameyê kiştene.

Qaso ke beyanatê Keyeyê Pawitişî de ameyo îdîakerdene, Sektorê Kesva û Cemraya û Meydanê Teyareyan ê Şamî de, hêzê rejimê Surîye û hêzê Îran û Hîzbullahî hedef ameyê girewtene.

Hetê bînî ra Meydanê Teyareyî yê Suveyda û yew depoyo ke binê kontrolê hêzanê rejim û Îranî de bîyo zî bîyo hedef.

Mudirê Keyeyê Pawitişî Abdullah Rahmanî no derheq de AFPyî rê qisey kerd û va, “Hetê Bîlançoya merdeyan ra ke merdim biewno ci, Gulana 2018î ra nat, hêrişê hende bi şidetî nêameybî kerdene.“

Îsraîlî menga Gulane de, bi desan hêrişê hewayîyî kerdîbî û nê hêrişan de 27 leşkerê rejimî, 11 ê xo leşkerê Îranî 21 leşkerê xerîbî ameybî kiştene.