Rayberîya Washîngtonî, menga Teşrîna Peyêne de hêzê caardişê serê rotişê petrolê Îranî newe ra kerdîbî pratîk.

Zafêrîye hêzê caardişê mîyanneteweyî yê serê Îranî, çarçewaya peymana nukleerî de menga Hezîrana 2015’î de Vîyana de amebî îmzakerdene.

Serekê DYE'yî Donald Trumpî dabi zanayene ke, peymana ke wextê serekê verê ey Barack Obama de ameye îmzakerdene kara Îranî tede esta û qerar dabi ke bi sereyê xo  peymane ra dest biancê. Bi nê hawayî hêzê caardişî newe ra kewtî rojdem.

Na çarçewa de serê rotişê petrolê Îranî de hêzê caardişî ameyî ferzkerdene, la 8 welatî teberê nê hêzanê caardişan de ameybî girewtene. Welatê ke teberê hêzanê caardişan muaf ameyê girewtene: Çîn, Hîndistan, Japonya, Koreya Başûr, Tayvan, Tirkîya, Îtalya û Yunanîstan. Nê welatan rê 6 mengî wext amebi dayene ke bieşkê petrol Îranî ra biherînê.

Goreyê xebera rojnameyê Washîngton Postî, Wezîrê Karanê Teberî Mike Pompeo roja Dişeme de eşkerayîyêk do bido û bido zanayene ke, muafîyetê ke seba 8 welatan ameyo dayene 2'ê Gulane de bêro wedaritene.