Iraqî de protestoyê ke sere de Bexdadî de Basra, Necef, Kerbela, Zîkkar, Mussena, Mîssan, Nasirîye, Dîwanîye de û herêmanê mîyanênan ê Iraqî de 1ê teşrîna verêne de dest pêkerdibî menga diyîne de dewam kenê.

Çalakîyanê protestoyî yê ke bi waştişê vurîyayîşê rejîmî dest pêkerdibî roja îneyî kerd ke Serekwezîrê Iraqî Adil Abdulmehdî beyanatê îstîfayî biko. Heman roje rayberê şîîyan Ayetullah Alî Sîstanîyî waşt ke parlemento paştî nêdo hukmatî. Abdulmehdîyî şewa şemeyî îstîfayê xo da. Yeno pawitene ke parlamento ewro bi hawayêkê biîstîsnayî bêro pêser.

Îstîfa ra dima zî nawnayîşan dewam kerd. Roja şemeyî bi taybetî Bexdadî de Basra, Necef, Zîkkar, Kerbela, Nasirîye û Dîwanîye de protestoyî bîyî zêde. Nawnayîşkerî wazenê ke pêro îdarekarî bêrê vurnayene û hukmkerdene.

Nawnayîşanê Necefî de netîceyê hêrişê hêzanê asayîşî de 25 kesî birîndar bîyî. Şaristanê fîraz ê şîîyan Necefî de nawnayîşkeran turbeyê Şîî Teqlîd Mercîî Muhammed Bakîr El-Hekîm da adirî ver.Polîsanê Necefî nawnayîşkeran ra waşt ke meydanê kuçeyê turbeyî de ney Meydanê Es-Sadreynî de bêrê pêser. Polîsan soz da nawnayîşkeran ke sucdarê hêrişan bêrê hukmkerdene.

Nasirîye de zî şar reyna vejîya meydanan. Roja şemeyî bi seyan kesî merkezê şaristanî de ameyî têhet û bi vêşnayîşê latîkan 3 pirrî girewtî. Bexdadî de û Nasirîye de hema zî tay rayîrî padaye yê. Ame parekerdene ke rayîrê ke şinê tesîsê petrolî û şîrketan ameyî akerdene. Nasirîye de têna pancşeme û îne tewr tay 67 kesî merdî. Bexdadî de roja şemeyî tewr tay 3 kesî merdî û 58 kesî birîndar bîyî. 1ê teşrîna verêne ra nat 400î ra zêdêr kesî merdî û tewr tay 16 hezar kesî birîndar bîyî. Gore xeberêka ajansê fermî yê Iraqî INA Konseya Hukm o Berzî merdimanê merdeyan ê ke hetê hêzanê asayîşî ra ameyî kiştene û birîndaran ra do biwaza ke îfade bidê. Beyanatê konseye de ame vatene ke: "Kesanê ke hêrişê nawnayîşkeran kerd çarçewa qanûnan de bi hawayêkê tewr xurtî do bêrê cezakerdene."