Janê Ebola: Komara Demokratîke ya Kongo de 443 kesî merdî
Di eyaletanê Komara Demokratîke ya Kongoyî de, menga Tebaxe ra na het, nêweşîya janî ver 443 kesî merdî.
Goreyê bîlançoya peyên a Wezaretê Weşîye yê Komara Demokratîke ya Kongoyî, destpêkerdişê janî ra na het, herêmanê Nord-Kîvu û Iturî de 715 kesê nêweşî ameyê tespîtkerdene. Goreyê beyanatê Wezaretî heta nika 443 kesî merdê.
Reyna goreyê bîlançoya Wezaretî 236 kesî, seba ke şupheyê nêweşîye esto ameyê muayenekerdene û 248 kesî zî nêweşîye ra dima bîyê weş.
Nêweşîya janî menga Tebaxe 2018 de, eyaletê Nord-Kîvu de ewil ameya tespîtkerdene û bi hewayêko lezkanî bîya vila. Naye ra ver zî 9 dolimî nêweşîya janî bîbî vila.
Janê Ebole verî serra 1976 de Kongo de vejîya û serra 2013î menga Kanûne de Afrîkaya Rojawanî de ame tespîtkerdene. Janê Ebola Gîne, Lîberya û Sîerra Leono de 30 hezar kesan de ame tespîtkerdene û 11 hezar ra zêde kesî merdê.
