Bi fermanê Serekê DYA Donald Trumpî meydanê teyarayanê Bexdadî de 2ê çileyî de bi fuzeyan Fermandarê Hêzê Qudûsî yê pabesteyê Artêşa Muxafizanê Şorişî ya Îranî Qasim Silêmanî û fermandarê Haşdî Şabîyî Ebu Mehdî El Muhendîs ameyî kiştene.

Rejîmê Îranî wextêkê kilmî ra dima herinda Silêmanîyî de fermandarêko newe tayîn kerd. Rayberê dînî Alî Hamaneyî rîpelê xo yê fermî de eşkerayîyêke weşanaye û vat: "Şehîdê serkewteyî Qasim Silêmanî ra dima ez general Îsmaîl Qaanî keno fermandarê Hêzanê Qudûsî."

Nêrazîbîyayîşê Moskova, Şam û Hîzbullahî

Wezaretê Karanê Teberî yê Rûsya pare kerd ke kiştişê Silêmanî alozîya herême do pîl bika û vat: "Silêmanî perwerê menfaatanê Îranî bi û bi nê hawayî xizmet kerd. Ma zerrî ra şarê Îranî rê serweşîye wazenê." Wezaretê Karanê Teberî yê Sûrîye zî vat: "Nê hêrişê namerdî yê Amerîka biryardarîya teqîbkerdişê nê şefan do zêde bikê." Rayberê têgêrayîşê Hîzbullahî yê Lubnanî Hasan Nasrallahî vat: "Cezakerdişê kiştoxanê sucdaran wezîfe û berpirsîyarîya şerwan û xoverdayoxanê pêro dinya yo."

Pekînî û Londonî Seba Kêmkerdişê Alozîye Veng Da

Vervatoxê Wezaretê Karanê Teberî yê Çînî Geng Shuangî vat: "Sere de DYA ma venga pêro terefgîran danê ke xo alozîya newîye ra tepîya bigêrê. Aramîye bipawê." Hukmatê Îngilîzî zî seba kêmkerdişê rewşa alozîye veng da.

Husî: Çareserîye Cewabdayîşê Bi Hawayêkê Lezî ya

Mîlîsanê Husî yê Yemenî yê ke terefgîrê Îranî yê waşt ke bi hawayêkê lezî cewabê nê hêrişî bêro dayene. Selahîyetdarê payeberzî yê Husîyan Muhammed Alî El Husîyî vat: "Ma nê kiştişî şermezar kenê. Çareserîye na aya ke ganî bi hawayêkê lezî cewabê ci bêro dayene." 

Netanyahu Îsraîlî ra Agêra

Serekwezîrê Îsraîlî Bunyamîn Netanyahuyo ke Yewnanîstan zîyaret kerdêne kiştişê Silêmanîyî ra dima agêra Îsraîl.

Sîstanî: Semedêko Heqdar Çin o

Otorîteyê Şîayî yê tewr berzî yê Îraqî Ayetullah Alî Sîstanîyî derheqê kiştişê Silêmanîyî de vat: "Semedêko heqdar çin o." Temsîlkarê Sîstanîyî Kerbela de eşkerayîyêke daye û vat: "Hêrişê vera Silêmanîyî binpaykerdişê bandurîya Iraqî yo." Bi seyan kesan eşkerayîye goştarî kerd û sloganê ''Seba Amerîka merg'' vat.