DYA pare kerd ke Meydanê Teyarayan ê Mîyanneteweyî yê Bexdadî de Fermandarê Hêzê Qudûsî yê pabesteyê Artêşa Muxafizanê Şorişî ya Îranî Qasim Silêmanî û Fermandarê Haşdî Şabîyî Ebu Mehdî El Mihendîs ameyî kiştene.

Ajansê Xeberan ê Farsî da zanayene ke Silêmanî ame kiştene. Wezaretê Pawitişî yê DYA (Pentagon) xebere tesdîq kerde ke bi operasyonê înan Silêmanî ame kiştene û vat: "Siêmanî bi xo kişîyayîşê bi seyan amerîkayîjan û endamanê koalîsyonî û bi hezaran birîndaran ra berpirsîyar bi.''

Hamaney Mesajê 'Qesasî' Da

Rayberê dînî yê Îranî Elî Hamaneyî derheqê kiştişê Silêmanî de qisey kerd û vat: "Silêmanî şi cenet, qesasê ci sucdaran ra do bêro girewtene.'' û Îran de qasê hîrê rojan şîne ameye îlankerdene. Yewînê Asayîşî yê Îranî bi asta berze seba ke mergê Silêmanî ra dima kamyew gamî bêrê eştene yenê pêser. Wazîrê Karanê Teberî yê Îranî Cevad Zarîfî hesabê xo yê twîtterî ser o vat: "Na çalakîyêka terorîste ya mîyanneteweyî ya."