Roja îneyî zaf roketî kewtbî qerargehêkê Amerîka yê Iraqî û leşkerêkê Amrîka merdbi. Amerîka 29ê kanûne de cewab da nê hêrişan û Tugayê Hîzbullahî ra 25 kesî kiştbi ke terefgîrê Îranî bîyî. Dima zî terefgîranê Haşdî Şabîyî 31ê kanûne de Sefaretxaneyê Amerîka yê Iraqî vêşnabi. DYA nê şewatî ra Îran sey berpirsîyar hesibna.

Wezîrê Pawitişî yê DYA Mark Esperî pare kerd ke ê do cade 750 leşkeran bierşawê Rojhelatê Mîyanênî. Esperî vat: ''Qasê 750 leşkerî do herême de bêrê cadayene. No cadayîş çalakîyêka bi armancê tebdîrî yo û cewabê gefanê vera personel û leşkeranê ma yê Iraqî yê."

Selahîyetdarêkê Amerîka AFP reyde qisey kerd û vat ke wextêkê eşkera de 4 hezar leşkerî do bêrê erşawitene herême.

Trump: Ez  Îran rê gef wanena

Serekê DYA Donal Trumpî zî Qesra Sipî de cewab da persanê muxabîran û persê 'DYA û Îran do şer bikê? ser o zî vat: "Ez vana qey ney.'' Trumpî 31ê kanûne de hesabê xo yê twîtterî ser o vat: "Îranî kiştişê merdimanê ma ra zî zîyanê tesîsanê ma ra zî sey berpirsîya bêro dîyene. O do bedelê naye bi giranî bidê. No hîşyarêk nîyo, gefêk o."

Hamaney: Ma do cewabê ci bidê

Rayberê dînî yê Îranî Elî Hamaneyî zî vat: "Eke kesêk gef ro menfaatanê welatê ma biko ma do bi hawayêkê bêgumanî cewabê ci bidê."