Komîsyonê Cinîyan ê Komeleya Heqanê Merdiman (ÎHD) a Amedî derheqê bîlançoya qirkerdiş û binpaykerdişê vera cinîyan de raporêk bînaya xo de eşkera kerd. Endama ÎHDyî Esra Saçaklidir rapor wend.

Esra da zanayene ke şîdetê zereyê keyeyî hetê komel û dewlete ra sey ''meseleyanê zereyî'' yeno dîyene û bira betalkerdişê qanûnê 6284î û Peymana Îstanbulî cîyakerîya cînsîyetî zêdînaya.

Esra vat ke çaresernêkerdişê meseleya kurdan, destsernayîşê şaredarîyan ra şîdetê vera cinîyan zêdîyeno. Esra bale ante îşkenceyê vera cinîyan ê tepişteyan ser zî.

Bîlanço de ame vatene ke tewr zaf nê şaristanan de heqê ciwîyayîşî yê cinîyan yeno binpaykerdene: Riha (21), Amed (16), Mêrdîn (13), Wan (10) û Dîlok (10) in.

Rapor de nê doneyî ameyî cagirewtene:

* Herême de tewr tay 39 cinîyî bi hawayêkê şikdarî merdî 

* Tewr tay 7 cinîyan xo kişt 

*Netîceya şîdetê zereyê keyeyî de 49 cinîyan dinyaya xo bedilnaye û 12 cinîyî birîndar bîyî. 

*Netîceya şîdetê komelkîye de 19 cinîyan dinyaya xo bedilnaye, 16 cinîyî birîndar bîyî û cinîyêke raştê tecawuzî ameye.

*Netîceya şîdetê camêrdan de 68 cinîyî ameyî qetilkerdene û 7 cinîyî ver bi întîharî ameyî berdene. 

* Bi nê hawayî mîyanê serrêke de herême de tewr tay heqê 114 cinîyan ameyî binpaykerdene.

*Tewr tay 57 cinîyî keye de bi hawayêkê şikdarî merdî. ''