Koordînasyonê KJKyî derheqê xespkerdişê Şaredarîyanê Dêrsim û Pulirî û qedexekerdişê sloganê 'Jin, Jiyan, Azadî' de eşkerayîyêke daye. Eşkerayîye wina ya:

''Îqtîdarê faşîst û qirkerî yê AKP-MHPyî Şaredarîyanê Pulir û Dêrsimî rê qeyûmî tayîn kerdî û vizêr şan zî sloganê 'Jin, Jiyan, Azadî' qedexe kerd. Hêverî dest nîya Şaredarîyanê Colemêrg, Mêrdîn, Êlih, Xelfetî û Esenyurtî ser, walîyê kolonyalîstî tayînê nînan ameyî kerdene û îradeyê şarî çin hesibîya. Tewr peyên zî Dêrsim û Pulirî de bi lezî sûcî ameyî peydakerdene û bi biranê mehkeme îradeyê şarê Dêrsimî ame xespkerdene. Ma îqtîdar û dewleta tirke ya faşîste rê vanê ke qirkerdiş û terteleyê ke şima 1937-38 de Dêrsim de kerdê do ser nêkewê. Dewleta tirke qiseyê 'Dêrsimî rê sefer beno la ser nêkeweno' ra derse nêgirewta û narey şaredarîyê ci kerdê hedef. Şexsê walîyê kolonyalîste de dewlete verê têkoşîn û xoverdayîşê şarê Dêrsimî de mîyanê dêsan de teng mende. Ma nê tewir û xoverdayîşî fîraz kenê. Hêzê îşxalkerê ke verê nê tewirî de panîk bîyê îşkenceyê şarê Dêrsimî kenê.

Hetê bînî ra sloganê 'Jin, Jiyan, Azadî' zî hetê walîyê Dîyarbakirî ra ameyo qedexekerdene. Tersê AKP-MHPyî pîl o; çunke verê têkoşînê cinîyan de bin keweno. Şîarê 'Jin, Jiyan, Azadî' pêro dinya de vurîyayo çimeyê têkoşîn û xoverdayîşî yê cinîyan. Îqtîdar, rejîm, sîstem, dîktator, dewlete û dişmenê cinîyan do verê nê şîarî de bin bikewê. Sey her qedexeyî no qedexe zî do bigino dêsê îradeyê xoverdayîş û têkoşînê rêxistinbîyayeyî yê cinîyan û do bin bikewo.

Rixmê pêro hêrişan û qedexeyan zî îradeyê xoverdayox, cinî, ciwan û şaran do çin nêbo. Destnîyayîşê şaredarîyan ra dima her çîyê bi kurdkî ame qedexekerdene, deyîrê bi kurdkî û hunermendê kurdî ameyî astengkerdene û konserî yenê betalkerdene.

Vera nê kerdişan sey ê Dêrsimî tewirêko xoverdayox û rêxistinkerde lazim o. Ganî cinî û ciwanî asta serkêşîye de tewrê xoverdayîşî bibê û rolê xo bîyarê ca. Hetê bînî ra paştdayîş û îtîfaq tersê îqtîdarî yê tewr pîlî yê. Coka ma bi xurtî îtîfaq û yewîye bikerê, xo ver bidê û têkoşîn û faşîzmî birijnê. Wext wextê ney o.

Hetê bînî ra propagandayê manîpulatîfî yê bi nameyê 'prosesî' yenê kerdene seba ercnayîşê hêrişanê dişmenîyan ê. Tecrîdê vera Rayber Apoyî bi cezayanê dîsîplînî bi giranî dewam keno. Vera kurdan, cinîyan û muxalîfan polîtîkayê hêriş û şerî yê dişmenî dewre de yê.ç Îqtîdarî ancî qiseyê şerê vera Rojawanî kerd. Planê hêriş û dişmenîye dewre de yê. Pîlkerdişê xoverdayîş û têkoşînî ra ber, çinkerdişê faşîzmê AKP-MHPyî ra ber rojdemêkê ma yo bîn çin o. Wext wextê çinkerdişê faşîzmî û servistişê cinî û şaran o. Nê esasî ser o ma venga pêro rêxistinanê cinîyan, dormeyanê demokratîkan danê ke vera nê kerdişanê faşîzanan tewirê xo bimojnê. Cuye bi xoverdayîş û têkoşînê rêxistinkerdeyî bena. Têkoşînê cinîyan do bibo Azraîlê rejîmê cînsîyetperestî yê faşîstî yê sextekarî.'