Lavrov, wextê serdana xo ya Vîetnam û Çînî de eşkerayêk daye televîzyonanê Çîn û Phoenixî û rewşa Sûrîye ercnaye.

Lavrov serê babeta 'Herêma Tampone' de vinet û peymana Edene ya serra 1998’î arde vîrî vat, “Nika hetê eskerî ra, tewirê Şamî verê çiman de bêro girewtene û serê formatê peyêne yê herêma tampone de yeno têserkerdene.” Lavrovî ard ziwan ke, ê cehd kenê ke destkewteyanê Tirkîya sewîyêka corî de verê çiman de bigêrê û vat, “ Eskerî, pozîsyonê Şamî û Tirkîya verê çaman de gênê û derheqê babete de serê teferuatan ê ke  ser o yenê pêkerdene vindenê.”

Lavrovî pêvînayîşê serekê Rûsya, Îran û Tirkîye yê Soçîyî ard vîrî û bale ante serê maneyanê Tirkîya yê 'terorîzmî' û vat, “Tirkîya reyde babeta ke kamcîn Kurdî terorîst ê de, têserekerdiş nêvirazîya. Tewirêkê cîyayê Tirkîya estê. Ma qesawetanê aye fam kenê, labelê ganî Tirkîya bivîna ke kamcîn grubî seba aye benê persa tehdîdî.”

Lavrovî vat, “Erdê Surîye de mabênê Rusya û Tirkîya de, yan zî Îranî de pêkerdişê operasyonêko hempar nêameyo plankerdene. Rûsya û Îran semedê waştişê hukmatê Şamî Sûrîye de xebate kenê. Tirkîya zî seba asayîşê xo de fikrê xo ana ziwan. Labelê Şam, nêwazeno ke eskerê Tirkî serê erdê ci de bimano.”