Macîrê başûrijî serd û vêşanîye ra dinyaya xo bedilnaye

Ciwanê ke Başûrê Kurdîstanî ra waştêne şiro Ewropa sînorê Belarus-Polonya de serd û vêşanîye ra dinyaya xo bedilnaye. Bi hezaran macîrê ke hema sînor de cuya înan zî binê tehluke de ya.

Ciwanê ke Başûrê Kurdîstanî ra waştêne şiro Ewropa vizêr saetanê serê sibayî de sînorê Belarus-Polonya de serd û vêşanîye  ra dinyaya xo bedilnaye. Nameyê ciwanî nêame musayene.

Kesê ke welatanê sey Iraq, Sûrîye û Somalî ra wazenê şirê Ewropa verî şinê paytextê Belarusî Minskî ke tîya ra xo biresnê Polonya. Xeylêk kesî daristanê sinorî de mabênê hêzanê Polonya ke destûr nêdanê ê ravêrê û serwîsanê asayîşî yê Belarusî ke nêverdenê ê peyser agêrê de mendî.

Aktîvîst û doktorî vanê bado ke serdî dest pêkerd rewşa macîran ê ke tedawî kenê xirabêr bîya û pîya bi problemanê vêşanîye û serdî problemê tibbî estê.