Mexdûrê erdlerzî yê Dîlokî: Sazgehê dewlete bêeleqe yê

Dîloko ke erdlerzî tesîro giran kerd, di rojî yo ke şarê ucayî teber de yo. Seba bêeleqeyîya sazîyanê dewlete gaziyan kenê.

Hûmara qurbanîyanê erdlerzê Kurdîstan û Tirkîya vêşî bena. Ê bajaran ra yew zî Dîlok û qezayê xo yê ke tesîrê erdlerzî zaf giran bî. Goreyê melumatanê masayanê krîzan, nê bajarî de 504 kesan dinyaya xo bedilnaye, 4 hezar û 809 kesî zî birîndar bîyî.

Merkezê bajarê Dîlokî de karê gêrayîş û xelisnayîşî hîna dewam kenê û şarê herême hewl dano ke bi îmkanê xo birînanê xo bipêşo. Şarê ucayî seba bêeleqeyîya dewlete gazîyan kenê û wazenê ke problemî bi lez û bez bêrê çareserkerdene.

Gere vernî dizdan bêro girewtene

Nevzat Guneşî ard ziwan ke, ey waşto hetkarî biresno mexdûranê erdlerzan la AFAD û polîsan vernîya ci girewto û dîyar kerd ke qezaya Nurdagi û Îslahîye de xeylê awanîyî rijîyayî. Guneşî  vat, ‘‘Gere dewlete hetkarî biresna wareyanê Mereş û Dîlokî. Ma wazenê keyeyê ucayî bêrê xelisnayene. Gere hetkarî dewijan rê zî bêra erşawitene û ma şarê xo yê ucayî xo vîr ra nêkerê. Hûmara merde û birîndaran ê dewan xeylê zaf a û sewbîna zî derûverî ra dizdîye yena kerdene. Gere polîsî vernîya nê çîyî bigîrê. Xora ma zaf zor û zehmetîyan ancenê, coka ma nêwazenê nê tewir çîyan dima bikewê. Roje roja paştîdayîşî ya.

Problemê werdî

Mexdûranê erdlerzî ra Mehmet Ugurkaplanî zî dîyar kerd ke nê 2 rojî yo ke teber de serdî ver o yê û vat, ‘‘Hema zî binê xirban de însanî est ê. ma wazenê ke ê heta ke weş ê, bêrê xelisnayene. Hetkarîyê ke yenê zî pêro yê şexsî yê. Wayîrê dikan û marketan benê hetkar. Problemê ma yê werd û şimitişî est ê. ma paweyê werd ê la hema zî nêameyo. Seba cayê rakewtişî zî qet çîyêk çin o û probelemêko gird o.’’

Mexdûrê erdlerzî vanê, hetkarîya AFAD û sazgehanê bînan ê dewlete xeylê kêm ê. Bi tabetî seba bêeleqeyîya şaredar, emnîyet û walîtîye gazîyan kenê.