Dima ke netîceyê Kongreya PKKyî ya 12ine ameyî eşkerakerdene Heyetê Rayberdişê Merkezî yê DEM Partî kom bi.

Vervatoxa DEM Partî Ayşegule Dogan derheqê kombîyayîşê MYKyî de eşkerayîya çapemenîye daye.Qiseykerdişê Ayşegule ra tayê noqtayê girîngî wina yê:

‘’PKKyî feshê xo îlan kerd û birî eşkera kerdî. No tena feshêk nîyo; seba demokrasî û vurîyayîşî vengdayîşêk o. Ma sey DEM Partî paştî danê nê biran. Dewrêk qedîyeno, oyo newe yo hêvîdar seba ma pêroyînan dest pêkeno. Hayîya ma bi mesuldarîyanê ma zî est a. Ma amade yê ke mesuldarîyanê xo bîyarê ca. Seba çareserîya demokratîke ya meseleya kurdan berêk abi. Ganî no firsendo pîl nêro zayîkerdene.

Ma ewro dî ke xîretê Birêz Ocalanî yê bi serran heba nêbîyî. Îqtîdarî ra eşkerayîyê pozîtîfî yenê. La ma do bivînê ke gamê senînî bierzîyê. Hinî ganî zemînê sîyasetî de hemwelatîya têdûşte û huqûqo têdûşt bêro awankerdene. Nê prosesî de Meclîs zî ganî mesuldarîyanê xo bîyaro ca.

Hinî haştîye xeyalêk nîyo. No proses prosesêko teslîmîyetî û tawîzî nîyo. Wa her kes bi cidîyetî nêzdîyê ci bibo. Hinî ganî tecrîdê vera Birêz Ocalanî biqedo û o gani bieşko bi aktîfî tewrê prosesî bibo.’’

Hemserekê DEM Partî Tuncer Bakirhanî zî babete ser o wina qisey kerd: ‘’Kongreya PKKyî wa Tirkîya rê fîraz ba. Seba çareserkerdişê meseleya kurdan û awankerdişê Tirkîyayêka demokratîke hinî bahane nêmende. Ma hêvîdar ê ke ma do nê prosesî bi haştîye tacîdar bikerê.’’

Endama Heyetê Îmraliyî Pervîne Buldan derheqê babete de vat: ‘’PKKyî xo fesh kerd. Hinî erk û mesuldarîye kewenê milê her kesî ser. Ganî nê prosesî de Birêz Ocalan bieşko rolê xo bîyaro ca. Wa Meclîs zî bikewo dewre û qanûnan sereraşt bikero.’’