Nasirîye de tewr tay 13 nawnayîşkerî ameyî kiştene!

Şaristanê Nasirîye yê Eyaletê Zikkarî de hêzanê asayîşî yê Iraqî hêrişê nawnayîşkeran kerd û netîce de tewr tay 13 nawnayîşkerî ameyî kiştene û 80 nawnayîşkerî zî birîndar bîyî.

Sere de paytextê Iraqî Bexdad, Necef, Kerbela, Basra, Zîkkar, Nasirîye, Dîwanîye, Mussena û Mîssanî de nawnayîşê vera hukmatî mengêke ra nat dewam kenê. Hukmatî nawnayîşan ra dima seba ke qerarê têkoşînê vera bêusûlîyan bêrê caardene caardişê qeraranê reformî giran kerd. Rojanê peyênan de nawnayîşî reyna bîyî bişîdet.  Dima ke Necefî de Konsolosxaneyê Îranî ame vêşnayene serebûtî bîyî zêde û ewro tesîrê ci Şaristananê Nasirîye, Zîkkarî û Dîwanîye de ameyî dîyene.

13 Merdeyî, 80 Birîndarî

Nawnayîşanê Nasirîye, Zîkkarî û Dîwanîye de hêzanê asayîşî yê Iraqî bi guleyanê raştikênan hêrişê nawnayîşkeran kerd û zaf nawnayîşkerî merdî. Gore zanayîşo ke hetê çimeyê Mudirîyetê Weşîye yê Nasirîye ra ame girewtene hêrişanê hêzanê asayîşî yê Iraqî û polîsanê Iraqî de 13 nawnayîşkerî merdî û 80 nawnayîşkerî zî birîndar bîyî. Ame parekerdene ke beno ke hûmara merde û birîndaran biba zêde.

 Tay sîyasîyî kiştişê nawnayîşkeran sey qesasê vêşnayîşê konsolosxane ercnenê. Nê tay kesî îfade kenê ke ê qerqilîyenê ke nê serebûtê kiştişî do bibê zêdêr û Iraqî de şerê zereyî do bivejîyo.