Çalakîkerê Iraqî her ca kontrol kenê

Iraq de nawnayîşê vera hukmatî dewam kenê. Mabênê hewteyêkî de 100 ra zêdêr nawnayîşkerî merdî û 4 hezarî ra zêdêr bîrîndarî bîyî. Nawnayîşkeran sere de Basra zaf cayê Bexdadî zî vistî dest.

Nawnayîşanê ke sere de paytextê Bexdad şaristanê Şîa yê Ereb Kerbela, Necef, Basra, Mîssan, Mûssena, Dîvaniye, Nasiriye, Babîl, Diyala, Zîkkarî de dest pê kerd, 15 rojan ra dima 25ê teşrîna verêne de reyna dest pê kerd. Mabênê hewteyêkî de 100 ra zêdêr nawnayîşkerî merdî û 4 hezarî ra zêdêr bîrîndarî bîy. Goreyê hûmara nêfermîye hûmara kesanê ke merdî bîye 300 û hûmara birîndaran zî  5 hezar a.

Hukmatê Iraqî seba vindertişê nawnayîşan zaf qerarî dayî. Nê qeraran ra yew zî newe ra rastkerdişê qanûno bingeyî yo. Nawnayîşkeran vat ke verê cû zî zaf qerarî ameyê girewtene la nêameyê caardene û bi nê hewayî nawnayîşan dewam kerd. Nawnayîşkeran zaf cayî sere de Basra fistî dest. Nawnayîşkeran Basra de bînayê partîyan, merkezê Heşdî Şabî, dezgehê fermî û hacetê leşkerî yê artêşe fistî dest. Necef û Kerbela de zî roja destpêkî ra nat hêzanê asayîşî vera nawnayîşkeran têgêrayêne. Nawnayîşan de zaf Şîayî merdî. Roja 5. de zî şarî tewrê nawnayîşan bîyo. Nawnayîşkeran cayanê tewr stratejîkan ra bînaya tewr berze ya ke sey restorantê Tirkan yeno zanayene, fiste deste. Dima ke nawnayîşkeran bîna fiste dest alaya Iraqî bîna ro daliqnaye.

Parlamenterê terefgîrê Sadrî çend rojan verê cû seba ke paşt bidê nawnayîşkeran Bexdad de tewrê çalakîyan bîy, labelê nawnayîşkeran ê merydan ra vetî. Rayberê Têgêrayîşê Sadr Muqteda El Sadrî seba ke paşt bidê nawnayîşkeran şo meydanê çalakîyan la nawnayîşkeran nêrazîbîyayîşê xo mojna ci û o meydan ra vet. Nawnayîşkeran vat:"Nawnayîşê ma û waştişê ma têna vera hukmatî yan zî partîyêke nîyê. Vera sîstemê nêheqîye yê." Serekwezîr Adil Abdulmehdî pare kerd ke o têna bi şertêkî do îstîfa biko. Goreyê beyanatê Serekkomarê Iraqî Berhem Salîhî  Abdulmehdîyî îstîfa qebul kerd. Goreyê selahîyetdaranê fermîyan û parlamenteran Abdulmehdîyî bi şerto ke semedê kiştişê nawnayîşkeran nêro hukmkerdene, qebul kerd ke îstîfa biko.