28 welatanê Yewîya Ewropa de roja Pancşemeyî ra nata veng dîya 500 mîlyon kesan ke rayanê xo bişuxulnê. Weçînitişê Parlamentoyê Ewropa roja Pancşemeyî bi weçînitişanê Brîtanya û Hollanda dest pêkerd. Roja Yewşemeyî zî 21 welatan de de qedîya.

Goreyê weçînitişanê 2014’î pêroyîya welatanê Ewropa de tewrbîyayîş bi zêde. Almanya de se ra 43 ra resa se ra 60, Fransa de zî nisbetê tewrbîyayîşî se ra 35 ra resa se ra 43.

Almanya de SPD’yî Kerd Kemî, Partîya Kesan Kerd Zêde

Goreyê netîceyanê destpêkî Almanya de hemparanê hukmatê Merkele rayê xo kerdî kemî. Nisbetê rayanê CDU û CSU se ra 30 ra kewt se ra 28. Partîya Sosyal Demokratan (SPD) zî derbeyêka girane werde.

Goreyê serra 2014’î nisbetê rayanê SPD’yî se ra 27 ra kewt se ra 15. Partîya Keskan zî nisbetê rayanê xo 11 pûanî kerdî zêde û resa se ra 21. Bi nê hawayî Partîya Keskan sîyasetê Almanan de reya ewilêne kewte herinda SPD’yî û bîye hêzo dîyin o tewr pîl. Partîya Çepe zî 1,9 pûan kerd kemî û kewte se ra 5,5.

Fransa de Rastgêrê Çetinî Bi Ser Kewtî

Goreyê netîceyanê ewilênan ê Fransa rastgêrê çetinî bi ser kewtî. Kanalê televîzyonî yê Fransa BFMTV’yî da zanayene ke partîya Yewîya Neteweyîye ya rastgêra çetine ke binê rayberîya Marine Le Penî (Front National-FN) de ya se ra 24,2’yê rayan girewtê.

Partîya serekkomar Emmanuel Macronî ya Komara Averşîyayî (LREM) zî se ra 22’yê rayan girewt û bîye partîya dîyine.

Salvînî Wazeno Ewropa de Bibo Raybero Rastgêro Çetin

Îtalya de goreyê netîceyanê ewilênan ke hetê kanalê Îtalya Raî ra ameyî eşkerakerdene, partîya rastgêra çetine Lîga ya ke binê serekîya Matteo Salvînî de ya bîye yewin. Yeno pawitene ke partîya Lîga se ra 31’ê rayan bigêro. Partîya Sosyal Demokrate zî bîye partîya dîyine û yeno pawitene ke se ra 21 ra heta se ra 25’ê rayan bigêro.

Rayberê partîya rastgêre ya çetine ya Hollanda Geert Wîldersî zî da zanayene ke o paştî dano Salvînî.

Welatanê bînan ê Ewropa de netîceyê ewilênî wina yê:

Awusturya: Awusturya de partîya serekwezîr Sebastîan Kurzî Partîya Şarî ya Awusturya (OVP) bîye partîya yewine. OVP’yî se ra 7,5 rayê xo kerdî zêde û resna se ra 34’î.

Bûlgaristan: Partîya Şarî GERB a ke binê rayberîya serekwezîr Boîko Borîssowî de ya bîye yewine. Yeno pawitene ke se ra 32’ê rayan bigêro. Partîya GERB’î zereyê Partîya Şarî yê Ewropa (EVP) de ca gêna. Sosyalîstan zî se ra 23’ê rayan girewtî û bîyî dîyin.