Temsîlkaro Taybet ê Neteweyê Yewbîyayeyî (NY) yê Îklîmî Luis Alfonso de Albayî da zanayene ke zafaneyê welatanê ke morê xo dayo binê Peymana Îklîmî ya Parîsî ro, qerar dayo ke sozanê xo yê seba kemîkerdişê tesîrê gazê serayî newe ra biercnê. De Albayî vat, 80 welatan hedefê xo seba vernîgirewtişê germbîyayîşê globalî kerdê zêde.

Temsîlkarê Taybetî yê Neteweyê Yewbîyayeyî vat, rixmê nê de zî hedefo ke ameyo bewlîkerdene dereceya ke yena waştene de nêyo. Kombîyayîşê berzî yê Îklîmî yê Neteweyê Yewbîyayeyî (COP21) de, ke serra 2015 de Parîs de virazîya, Peymana Îklîmî amî amadekerdene û Nîsan a 2016’î de welatan rê amî pêşkêşkerdene. Netîce de 197 welatan morê xo da binê peymane ro. Amacê Neteweyê Yewbîyayeyî o yo ke tesîrê gazê serayî ke beno sebebê germbîyayîşê globalî heta serra 2030’î nisbetê se ra 30’î de bêro kemîkerdene û heta serra 2050’î zî bi temamî bêro qedînayene. Vilakerdişê gazê serayî de Dewletê Yewbîyayeyî yê Amerîka (DYA) rêza destpêkî de ya. Serekê DYA Donald Trump, hedefanê îklîmî ra agêra ke serekê verê ê Barack Obamayî ê hedefi qebûl kerdîbî. DYA ra dima welato ke tewr zaf gazê serayî vila keno Komara Şarî ya Çînî ya.