Komîteya Heqanê Merdiman a Neteweyanê Yewbîyayeyan (NY) da zanayene ke 16ê êlule çalakîyanê Îranî ra nata tewr tay 23 domanî hetê hêzanê Îranî ra ameyî qetilkerdene û bi seyan domanî zî birîndar bîyî, ameyî destbendkerdene û îşkencekerdene.

Rêxistina Efûyî ya Mîyanneteweyîye zî bi eşkerayîyêke pare kerdbî ke çalakîyan de tewr tay 23 domanî kişîyayê.

Komîteya NYyî eşkerayîye de bale ante ser ke Îran de heqê domanan bi giranî yenê binpaykerdene û waşt ke derheqê babete de cigêrayîşêko xoser û bêteref bêro kerdene. Komîte binpaykerdişî şermezar kerdî û vat: ''Rixmê xemgînîya mergê domananê xo zî keyeyan rê teda yena kerdene ke wa nêvajê domanî hetê dewlete ra kişîyayê.''

Komîte venga selahîyetdaranê Îranî da ke peynîya nê binpaykerdişan bîyara.

Hetê bînî ra Rêxistina Heqanê Merdiman a Îranî zî pare kerdbî çalakîyan de 27 domanî ameyê qetilkerdene.