Pîrikê Plaza de Mayoyî Dişemeyê vîyarteyî de eşkera kerd ke nasnameyê tornêkê înan ê bînî ameyo tesbîtkerdene.

Pîrikê Plaza de Mayoyî menga Nîsane ya derbazbîyayîye de eşkera kerdîbî ke tornê înan ê 129’in o vîndîbîyaye ameyo dîyayene.

Têkoşînê pîrikan dewam keno. Hîna tew kêmî nasnameyê 400 pitikan ê ke wextê dîktatorîya Ajantînî de ameyê vîndîkerdene, ganî bêrê tesbîtkerdene.

Komela Pîrikan vizêrî eşkerayîyêk daye çapemenîye. Lajê Elena Mîjalchuke û Juan Manuel Darrouxî yo bi nameyê Javîer Matîas Darroux zî tewrê kombîyayîşî bi ke serra 1977’î ra nata vîndîbîyaye bi.

Dayîka Darrouxî, serra 1977 de wexto ke seba hemserê xo yê vîndîbîyayeyî bivîna şina adresêk û a zî ameye remnayene.

Juan Manuel Darroux wexto ke beşê rayberîye ya Unîversîteya Moronî de xebitîyêne Elena Mîjalchuke nas kerde.

Serra 1977 de paytextê Buenos Aîresî de nuqtaya sahnekerdişî de hetê hêzanê ‘asayîşî’ ra bi zor wesayîtî ra ameye suwarkerdene û remnayene.

Wextêk ra tepîya Elena xo resna adresa ke hemserê aye tede bi. Keyeyê xo berd cayê pêvînayîşî û Elena zî no wext de ameye remnayene.

Goreyê zanayîşan Javîer Matîas hîrê blokî dûrî yê merkezê îşkenceyî de hetê cinîyêk ra ame dîyayene.