Serekkomar Emmanûel Macron beşdarê werdê emserî ê Konseya Koordînasyonê Sazîyanê Armenîyan ê Fransa bi û yew peyamo muhîm da Armenîyanê Fransa.

Macronî qiseykerdişê xo de bale ante ser û va; “Osmanîyan Armenîyî qir kerdî û Fransa zî no qetlkerdiş nas kerdo.“ Macronî va 24’ê Nîsane do sey roja ‚Qirkerdişê Armenîyan a Neteweyîye‘ bêro qebulkerdene. Qaso ke Macron vano no derheq de qeraro fermî do no hewte bêro girewtene.

Bi nê qerarê sembolîkî, “Roja Yadkerdene ya Qirkerdişê Armenîyan a Neteweyîye“ do serrnameyê Fransa de, bi hewayêkê fermîyî ca bigîro.

Armenîyî seba ke qirkerdiş bi hewayêkê fermîyî bêro qebulkerdene bi serran o ke mucadele kenê. Senatoyê Fransa û Meclîsê Neteweyî yê Fransa, destpêkerdişê serra 2001’î de, bi yew beyanat, Qirkerdişê Armenîyan bi hewayêkê fermîyî qebul kerdibi.