Çarçewaya qanûnê efûyî yo ke Şeme Meclîsê Neteweyî yê Nîkaragûayî de ame qebûlkerdene, tew tay 50 kesî ameyî veradayene. Yeno vatene ke nê kesê ke ameyê veradayene, mûxalîfê ke serra parî vera Serekdewlete sosyalîst Danîel Ortega û rayberîya ey çalakîye kerda yê.Goreyê zanayîşan mîyanê 50 kesanê ke ameyê verdayene de rojnamegerê mûxalîf ê namdarî Marlon Powell û Hansel Vazquezî estê.

Bi seyan kesî merdîbî

Serra parî menga Nîsane de vera reformê asayîşî yê cimatî yo ke hukmatê Nîkaragûayî waşt bikero, protestoyan dest pêkerdîbî û nê protestoyan bi mengan dewam kerdîbî. Wextêko kilm de protestoyan ê seba îstîfakerdişê Danîel Ortegayî û newe ra kerdişê weçînayîşan de tewr kêmî 325 kesan cuya xo vîndî kerde, 2 hezarî ra zêdeyî kesî zî bîbî birîndar.

Yeno texmînkerdene ke 600 ra heta 800 kesî wextê protestokerdişan de ameyî girewtene. Hetê bînî ra goreyê zanayîşê ke ameyê girewtene, menga Sibate ra nata zî nêzdîyê 436 kesî ameyî veradayene. Meclîsê Neteweyî yo ke qanûnê efûyî veto, hetkarê Ortegayî zafane yê. Labelê mûxalefet û tayê sazgehê heqanê merdiman îdîa kenê ke bi qanûnê efûyî yeno waştene ke hêzê paramîlîter ê ke protestoyan de suc kerdo bêrê veradayene.