Şîrketê çekan ê Almanya Rheînmetallo ke Kurdistanî ra heta Yemenî, Meksîka ra heta welatanê Afrîka xeylî herêmanê şerî yê dinya de seba rejîmanê zordaran çekan virazeno, her serre peynîya Gulane de pardaranê xo reyde Berlîn de kombîyayîşê serraneyî virazeno. Sermayedarê şer û endustrîyê çekan, 28'ê Gulane roja Sêşeme de sey her serre Hotela Marîtîmî de do bêrê het.

Yeno pawitene ke kombîyayîşî de sermayegozarî û projeyê neweyî yê Rheînmetallî bêrê ercnayene. Hemverê şerî yê Almanijî û xeylî aktîvîstê aşitîye nê kombîyayîşan sey “Şerê dinyaye tîya ra dest pêkenê” name kenê. No semed ra aktîvîstê xeylî bajaranê Almanya plan kenê ke vernîya otela ke kombîyayîş tede do bêro viraştene de aktîvîteyan bivirazê.

Aktîvîteyan de do şerê Erebîstanê Siûdî yê Yemenî ra heta hêrişanê dewleta Tirkî yê vera Kurdan, bi taybetî cehdkerdişê seba îşxalkerdişê Rojawanî, şer û bazirganîya çekan bêra şermezarkerdene. Kombîyayîş do Hotela Marîtîmî ya Stauffenbergstraße 26 de, saete 10:00 de dest pê bikero û çalakîyê protesteyî zî heta qedîyayîşê kombîyayîyîşî dewam bikerê.

Amancê hemveranê şerî o yo ke bi çalakîyanê protestoyî û bi bêîteatîya sîvîle bikerê ke beşdarê kombîyayîşî aciz bibê û nêeşkê qeraran bigêrê.

Kombîyayîşê parî yê Rheînmetallî de reaksîyonê vera îşxalkerdişê dewleta Tirkî yê Efrînî kewtîbî vernîye. Kombîyayîşî de pankarta bi nuşteyê “Wa panzerê Almanan Kurdistanî ra bivejîyê” ameybî akerdene û rejîmê Erdoganî reyde hemkarîya dewleta Almanî amîbî şermezarkerdene.