Seba weçînayîşê endamanê newe yê Parlamentoyê Ewropa (PE), raydayîşê destpêkî roja Pancşeme Brîtanya û Hollanda de amebî viraştene.

Ewro zî Fransa, Almanya, Yunanîstan, Portekîz, Îspanya, Îtalya, Bulgarîstan, Romanya, Macarîstan, Polonya, Awusturya, Xirvatîstan, Slovenya, Lîtvanya, Estonya, Fînlandîya, Swêd, Danîmarka, Belçîka, Qibris û Luksembur şinê sindoqan ser.

Yewîya Ewropa ya ke 28 welatan ra yena pê, nusufê xo  508 mîlyon merdim ê, 427 mîlyon weçînayoxî estê. Semedê qerarê vejîyayîşê Brîtanya yê mîyanê Yewîya Ewropa (Brexît) ra, serra 2014 de qerar da bi ke Parlamentoyê Ewropa yo ke 751 kursîyan ra yeno pê, hûmara kursîyan bikewo 705 kursîyan. Bi saya naye 27 kursîyê zêdeyî do mîyanê  14 welatan de bêrê parekerdene û sere de Fransa, Îspanya û Îtalya yenê. Labelê seba ke qerarê Brexîtî hîna zelal nêbîyo, Brîtanyaya Girde zî tewrê nê weçînayîşî bîye. Parlamenterê ke Brîtanya de do bêrê weçînayene, heta ke Brexît bivirazîyo Parlamentoyê Ewropa de bimanê.

Hûmara kursîyanê ke bena para welatanê endaman wina ya:

Almanya: 96; Fransa 74, Îtalya û Brîtanya 73; Îspanya: 54; Polonya: 51; Romanya: 32; Hollanda: 26; Belçîka, Yunanîstan, Macarîstan, Portekîz û Çekya: 21; Swêd: 20; Awusturya: 18;Bulgarîstan: 17; Danîmarka, Fînlandiya û Slovakya: 13; Lîtvanya, Îrlanda û Xirvatîstan: 11; Letonya û Slovenya: 8; Qibris, Estonya, Luksemburg û Malta 6 kursî.