Eyalatê Badgisî yê rojawanê Afganîstanî de bi seyan mîlîtananê Talîbanî rê operasyon ame kerdene û ame zanayene ke netîceyê operosyonî de bi desan hêzê asayîşî yê Afgan û mîlîtanê Talîbanî merdî.
Rêxistina Talîbanî ya ke nê di menganê peyênan de hêrişê xo zêde kerdê, seba ke hukmatê merkezî hêzanê xo yê asayîşî herême de zêde nêkeno, yeno vatene ke kêm mendo ke kontrolê herême bikewo destê Talîbanî.
Goreyê Reutersî, îdarekerê bajarokê Bala Murgabî Warîs Şerzadî ard ziwan ke rêxistina Talîbanijan 36 emdamê hêzanê asayîşî kiştê û xeylî nuqteyê asayîşî kerdê ra xo dest. Vervatoxê Walîtîya Badgisî zî da zanayene, şer de 30 ra zêdeyî şerwanê Talîbanî ameyî kiştene. Vervatoxanê Talîbanî ra Yûsûf Ahmedî berpirsyarîya hêrişan girewte xo ser û da zanayene ke înan çar herêmanê cîyayîyan de operasyon kerdo û panc nuqteyê asayîşî kerdê ra xo dest. Wezaretîya Pawitişî Twîtterî ser o eşkerayîyêk daye û îdîa kerd ke, hêzê Efkanî seba çîyêk bi sîvîlan nêro kerdene tercîhêko stratejîk kerdo ra xo ver û nuqtayanê asayîşî ra ancîyayê. Wezaretîye da zanayene, vera nuqtayanê Talîbanî xeylî reyan hêrişê hewayî ameyî kerdene.
