Alozîya mabênê DYE û Îranî tesîr bi serê sîyasetê mîyanê Îranî û welatanê herême kena. Serekkomarê Îranî yo ke meylê ci bi muzakereyan esto, ard ziwan ke şertê ewroyî goreyê muzakereyî nîyê. Serkêşanê Şîa yê Iraqî zî da zanayene ke şer de tewr zêde Iraq do zirar bivîno.

Alozîya mabênê DYE û Îranî zêde bena. Na alozîye bîye sebebê ewnîyayîşanê cîyayan ê mabênê mûhafazakar û reformîstan ê Îranî. Serekê rûhanî yê Îranî yo ke serkêşîya hetê mûhafazakaran keno, Seyîd Alî Hamaney vera DYE reyde muzakere û dîplomasî vejîyabi û dabi zanayene ke no jehr o. Serekkomar Hasan Rûhanî zî ard ziwan ke o hetkarê muzakere û dîplomasî yo labelê şertê ewroyî goreyê muzakereyî nîyê.

Rûhanî vizêrî serkêşanê Dînî yê Şîayî de ame têhet û vat ke, “Dişmenî her dem waşt ke Îranî de na alozîye bido destpêkerdene, labelê ma nêverda. Zereyê ma de tayînê waştêne ma peymana nukleerî ra vejîyê labelê xoverdayîşê serê nê zemînî xeylî zor bi. Eke ma peymana nukleerî ra bivejîyêne, rayapêroyî ya mîyanneteweyî û Neteweyê Yewbîyayeyî zî zext bi ma kerdêne.” Rûhanî da zanayene ke o hetkarê muzakere û dîplomasî yo labelê nê şertan de ê muzakereyan qebûl nêkenê.

Peymana Petrolî ya mabênê Iraq û DYE ame taloqkerdene

Mabênê Iraq û şîrketê petrolî yê bi nameyê Exxon Mobîlî yê DYE de derheqê petrolî de peymanêk ganî biameyêne îmzakerdene labelê rîyê krîzî ra peymane ameye taloqkerdene. Wezîrê Petrolî yê Iraqî Samîr Gabdanî ard ziwan ke na peymana 53 mîlyar dolarî taloqe tarîxêkê nedîyarî ameye kerdene. Semedê alazîya mabênê DYE û Îranî ra serkêşê Şîî yê Iraqî bi eşkerayîye fikarê xo dayî zanayene. Serekê Têgêrayîşê Sadrî, Mûkteda El Sadrî da zanayene ke eke mabênê DYE û Îranî de şer biqewemîyo, no şer do peynîya Iraqî bîyaro. Dimayê Sadrî awankerdoxê Haşdî Şabî û Serekê Koalîsyonê Fetîhê Hadî Amîrî zî ardbi ziwan ke şerê mabênê Îran û DYE do bibo binkewtişê heme kesan û her di hetan ra waştibi ke Iraqî nêkerê mîyanê nê şerî