Serekê Amerîka Donald Trumpî hesabê xo yê twîterî ser o yew beyanat da û vat ke eke Tirkîya hêrişê Kurdan bikero,  Amerîka do 32 kîlometreyê sînorî de herêma ewleyîye bino ro.

Beyanato ke Trumpî dayo wina yo:

"Surîye ra peyserancîyayîşo ke ereykewte dest pêkerdo û eynî wext de çîyê şenikê ke DAIŞî ra pey mendê, bişîdet danîme înan zî. Eke DAIŞ newe ra bêro pêser û hêriş bikero, ma do stargehanê xo yê leşkerî ra cewab bidê ci.

Tirkîye eke hêrişê Kurdan bikero, aye zî hetê ekonomîyî ra rijnenîme. 20 mîl dergîye de herêma ewlehîye îlan kenîme ke û wazenîme ke  Kurdî zî Tirkîya provake mekerê.”

Trumpî wina dewam kerd:

,“Polîtîkaya  Amerîka ya demderge ya Surîye de, vera DAIŞî mucadele de faydeyo tewr muhîm Rusya, îran û Surîye rê bîyo. Ma rê zî faydeyêko pîl bîyo la wextê peyserantişê leşkeranê ma ameyo. ŞERÊ KE PEYNÎYA XO NÊNA BIDÊ VINDERTENE!"

Nê hewteyanê peyênan de mabênê Tirkîya û Amerîka de tengîzîyayîşêko fekî her ke şono beno berz. Naye ra ver qet yew serekê Amerîka ra , Tirkîya rê hande eşkera gefî nêameybî wendêne. Tirkîya NATO de sey mutefîka tewr muhîme ya Amerîka yena zanayene.

Wezaretê Karanê Teberî yê Amerîka Mike Pompeo yî 13ê Çile de yew beyanat dabi û vatbi seba ke YPG bêro şeveknayene hêvîyê mi estê ke ma Tirkîya de bikîme têser û wina dewam kerdbi: "Heqa şarê Tirkîya û Erdoganî esta ke xo terorîstan ra bişeveknê, la heto bîn ra kesê ke ma pîya kewtîme şer, ey zî ganî bêrê  şeveknayene."

Pompeo yî naye ra ver zî vatbi ke beno ke Tirkîya Kurdan qetl bikero.

Tirkîya cewab da gefanê Donald Trumpî yê peyenan. Vervatoxê Serekkomarî Îbrahîm Kalinî twîtter de cewab da Trumpî û va, “Tirkîya Kurdan de nê terorîstan de şer kena”

Wezaretê Telekomînîkasyonê Serekkomarî Fahretîn Altunî zî medya ya sosyale ser a yew peyam nuşt û peyamê xo de va, "Tirkîya dişmenê Kurdan nîya, wayîrê Kurdan vejîna."

Heto bîn ra zî Wezaretê Pawitişî yê Tirkîya zî, twîtterî ser o vatena Erdoganî ya serra 2015î pare kerde. Erdoganî serra 2015î de wina vatbi: “Ez venga pêroyê Dinya dana: bedelê xo çi beno wa bibo,ma destûr nêdanîme ke wa Bakurê Surîye de yew dewlete bêro ronayene”