Roja Şemeyî serekkomarê Îranî Hasan Rûhanîyî aktîvîstan dir ame têhet. Rojdemê Rûhanî de ambargoyê DYA yê serê Îranî û netîceyê ci estbî.

Rûhanîyî DYA qest kerd û vat zexto sîyasî û îqtîsadî yê dişmenî yê serê înan sey “şerêk ke tarîxê şorişî de nêameyo dîyene” yo.

Rûhanîyî vat ambargoyê DYA yê serê Îranî zaf bitesîr o û vat ke prosesanê winayênan de ganî heme organî pîya bixebitîyê. Rûhanîyî vat, “Zextê sîyasî û îqtîsadî yê dişmenan ê serê Îranî, nimûneyêkê ci yo winayên hewna tarîxê şorişî de nêameyo dîyene. Bisînorkerdişê dişmenî yê wareyê bankayan, serê rotişê petrolî, petrokimya, polad û beranê zîretî bitesîr o.”

Rûhanîyî ard ziwan ke ê do teslîmê şertanê giranan ê ambargoyî mebê la erkê înan ê sey serekkomarî û hukmatî bisînor ê. Rûhanîyî bale ante serê xîlafanê mabênê xo û rayber Elî Xamaneyî û vat, “Serekkomar bi qasê hêz û erkê xo eşkeno hukmatî ra çîyan biwazo.”

Rûhanîyî vat, problemê ekonomîye yê şarî esto la problem tena ekonomîk nêyo, ganî mesele bi hîrayî bêro ercnayene û seba ke heqê probleman de vejîyê aktîvîstanê sîyasîyan ra paştdayîş waşt.