Îneyê ravêrteyî de Konseya Leşkerî pêhesnabi ke ê eşkenê têgêrayîşî şarî dir ronişê. Konseya bi nameyê ‘Konseya Hakime’ do prosesî rayra bero. Do 18 mengî serekê konseye leşkerî bê û dima ra zî do sivîlî bibê serek. Do proseso demkî qasê 3 serran dewam bikero.

 Etyopya û Yewîya Afrîka nê cehdî rê serkêşîye kerde. Serekê Konseya Leşkerî Abdulfetah el Bûrbahî televîzyon de vat ke “Konseya Leşkerî do peymane bipawo û bica bîyaro.”

 Do Konseya demkîye de panc leşkerî û şeş sivîlî estbê. Sivîlê ke îdareyî de yê do Tîfaqê Azadî û Vurayîşî ra bê, ke çalakîyan rê serkêşîye kerdebî.

 Sûdan de rîyê vaybîyayîşê qasê hîrê hendeyî yê nanî, protestoyî ameybî destpêkerdene û dimayê wextêkê kilmî waştîbî rejîmê Omer el Beşîrî bêro fînayene. Çalakîyan ra dima 11’ê Nîsane de rejîmê Beşîrî kewtibi û leşkeran dest dabi serê îdareyî. A roje ra nata şarê Sûdanî kuçeyan de yo. 3’ê Hezîrane de çalakîya roniştişî amîbî viraştene. Polîsan hêrişê na çalakî kerdibi û nê hêrişî de 128 kesî ameybî kiştene.