Wezîrê Karanê Teberî yê Îranî twîtterî ser o eşkerayîye daye û vat, “Alayê qirkerî do nêeşkenê Îranî bin bikerê.”

Serekê DYE Donald Trûmpî roja Yewşemeyî twîtterî ser o vatibi ke, “Eke Îran biwazo şer bikero, no do bibo peynîya Îranî.” Dimayê na eşkerayîye Fermandarê Mûxafizanê Şorişî Huseyîn Selamî da zanayene ke Îran şer nêwazeno labelê şerî ra zî nêterseno. Goreyê Tehranî DYE nêeşkeno kendawe de şerêk bido destpêkerdene. DYE na serra peyêne de zextê xo yê serê Îranî zêde kerdî. DYE tewr peynîye de ambargoyo ekonomîk serê Îranî de dabi destpêkerdene. Tewr peynîye de DYE da zanayene ke Îran amadekarîya şerî keno û keştîyêka şerî û teyareyî şawitîbî Kendawe.