Alozîya mabênê DYA û Îranî her roja ke şina giran bena. DYA destpêkê Gulan a 2018’î de xo peymana nukleerî ra antibi, dima ra zî mueyîdeyî fînayî dewre. Mueyîdeyo tewr peyên sere sektoranê banka û petrolî de amebi bicaardene. Dimayo ke Kendawe de hemverê keştîyan de hêriş ame kerdene û teyareyêko bêmerdim ê Amerîka nizdê Kendawa Hurmuzî de ame fînayene, alozîye resaye dereceyêka newî.

Trumpî ard ziwan eke Îran fek programê nukleerî ra vera bido o do ci rê bibo ‘dosto tewr rind’ û bi rayîrê Twîtterî eşkerayîyêka newî weşanaye û vat, “Dişeme ma do hemverê Îranî de mueyîdeyanê neweyan ê pîlan bifînê dewre.”

Trumpî verî baxçeyê Saraya Sipîye de eşkerayîyêk dabî rojnamegeran û vatibi, “Ma do destûr nêdê ke Îran bibo wayîrê çekê nukleerî. Gama ke înan no qebûl kerd a game ê do bibê welatêko dewlemend, do zaf kêfweş bibê û ez do zî bibî dostê înan o tewr rind. Ez umîd kena do no çî bibo.”

Serekê DYA vat, “Labelê eke îdarekarê Îranî tewirêkê nerindî ramojnê, do rojêka xeylî nerinde rê bibê şahid.”

Trumpî vat, o umîd keno ke Îran do bi ‘mentiq’ tê bigêro û vat, “Eke ma bieşkê awankerdişê ekonomîya Îranî sererast bikerê do no xeylî rind bo.”

Trumpî ard ziwan ke rixmê na bendewarîye de do mueyîdeyê ekonomîkî yê hemverê Îranî dewam bikerê.