Trumpî bi rayîrê Twîtterî eşkerayî daye û vat, “Eke Îran wazeno şer bikero, a game do na yewe bibo peynîya Îranî.” Trumpî waşt, “Çi rey DYA rê gefan nêwano.”

Verê na eşkerayîye fermandarê muhafizanê şorişî Huseyîn Selamî eşkera kerdibi ke Îran şer nêwazeno, labelê şer ra zî nêterseno. Goreyê Tehranî DYA wayîrê ê îmkanan nêyo ke Kendawe de şer bikero.

DYA no serrêk o ke zextê xo serê Îranî de kerdê giran. DYA dimayo ke Gulan a 2018’î de bi hawayêkê yewhetî xo peymana nukleerî ra ante, dest bi mueyîdeyanê ekonomîkan kerd. Qesawetê virazîyayîşê şerî her ke şino zêde beno, labelê serekê DYA kombîyayîşêkê Qesrê Sipîyî de vatibi, eleqedarîya înan a seba şerêkê hemverê Îranî çina.

Rixmê nê de zî alozîye tim yena pîlkerdene. DYA tewr peynî de îdîa kerdibi ke Îran amadekarîyan keno ke hêrişê hêzanê DYA yê herême bikero û leşkeranê xo ra waştibi ke bikewê mîyanê alarmî. Pentagonî zî hûmara leşkeranê xo yê Kendawe kerdî zêde. Keştîyêka teyareyan û teyareyê şerî şirawitî.