Seba weçînayîşê endamanê newe yê Parlamentoyê Ewropa (PE) yo ke 28 welatan yeno viraştene, weçînayoxî ewro ra tepîya do şorê sindoqan ser. Yeno texmînkerdene, cimato newe yê Parlamentoyê Ewropa de partîyê neteweperest û nîjadperestî do xurt bibê.
Seba ke Yewîya Ewropa (Brexît) ra prosesê cîyabîyayîşê Brîtanyaya Girde senî ke yeno plankerdene rayîr de şoro, nê welatî de weçînayoxî seba weçînayîşê endamanê neweyan ê Parlamentoyê Ewropa şinê serê sindoqan. Brîtanya reyde Hollanda de zî ewro raydayîşî dest pêkerd.
Weçînayîşê seba Parlamentoyê Ewropa do heta roja Yewşeme dewam bikero. Hûmara kursîyan a ke netîceyê weçînayîşî de mabênê welatan de do bera parekerdene wina ya: Almanya: 96; Fransa 74, Îtalya û Brîtanya 73; Îspanya: 54; Polonya: 51; Romanya: 32; Hollanda: 26; Belçîka, Yunanîstan, Macarîstan, Portekîz û Çekya: 21; Swêd: 20; Awusturya: 18; Bulgarîstan: 17; Danîmarka, Fînlandîya û Slovakya: 13; Lîtvanya, Îrlanda û Xirvatîstan: 11; Letonya û Slovenya: 8; Qibris, Estonya, Luksemburg û Malta 6.
Yewîya Ewropa ya ke nufusê xo 508 mîlyon o, 427 mîlyon weçînayoxê qeydkerdî estê. Weçînayîşo ke ewro Brîtanyaya Girde û Hollanda de dest pêkerd, Fransa, Almanya, Îspanya de roja Yewşeme de do dest pê bikero.
Tarîxê raydayîşê welatanê Yewîya Ewropa wina yê:
23'ê Gulane (ewro): Brîtanyaya Girde û Hollanda
24'ê Gulane: Îrlanda û Çekya (Roja destpêke)
25'ê Gulane: Çekya (Roja dîyine), Letonya, Slovakya, Malta û herêmê Fransa yê ke hetê bînî yê deryayî de yê
26'ê Gulane: Fransa, Elmanya, Yunanîstan, Portekîz, Îspanya, Îtalya, Bulgarîstan, Romanya, Macarîstan, Polonya, Awusturya, Xirvatîstan, Slovenya, Lîtvanya, Estonya, Fînlandîya, Swêd, Danîmarka, Belçîka, Qibris û Luksemburg.
