Wekîlê Wezîrê Pawitişî yê DYE’yî Patrîck Shanahan dimayê antişê eskeranê Amerîka yê Surîye, seba ameyoxê estbîyayîşê eskerî yê înan ê Iraqî, şi serdena Bexda.

Shanahan menga Çele de dest bi wezîfeyê xo yê Pentagonî kerdibi û roja Sêşemeyî şibi serdena Afganistanî.

Shanahan bado zî şi Iraq. Na serdene, serekê DYE’yî Donald Trûmpî eşkerayêka ke seba peyînayîşê Îranî ra ê wazenê estbîyayîşê xo yê eskerî yê Iraqî bipawê daybi, ameye kerdene. Na eşkerayêk Iraqî de bîbî semedê alozîyî. Iraq de cepheyê ke xo nêzdîyê Îranî vînenê reyde zaf kesî wazenê ke eskerê Emerîka Iraqî ra serheb bivejîyê.

Seba antişê eskeranê Amerîka, pêşnameyêkê qanûnî pêşkêşê meclîsî kerd. Ame bewlîkerdene ke no pêşname hetê serkêşîya lîsteya Mûktada Sadr ê Şîî û bloka milîsanê verênî yê Îranî ra yeno qebulkerdene. Her di lîsteyan zî roja Dişemeyî de pîya eşkerayêk dayebî û ardbi ziwan ke ganî estbîyayîşê eskerî yê hêzanê xeriban yê Iraqî newe ra bêrê ercnayene.