Serekê DYA Donald Trumpî pare kerd ke o do 27'ê Teşrîna Verêne de eşkerayîyêka girînge bike û kanalanê CNN û ABC zî goreyê xeberanê selahîyetdaranê payeberzan ra girewt, vat ke El Bagdadî Vakur û Rojakewtena Sûrîye de operasyonêkê artêşa Amerîka de sey merde ame dîyene.

Goreyê CNN'yî seba  ke bi hewayêkê fermî bêro rastkerdene ke Bagdadî rê test yeno kerdene. Selahîyetdaro ke ABC'yî rê qisey kerd, vat Bagdadîyî yelego bombayên xo ser de teqnayo.

Pentagonî AFP'yî rê pare kerd ke ê do derheqê babate de şirove nêkê, la Trumpî saeta 09:00 ya wextê Amerîka do eşkerayîyêka girînge bike.

Trumpî verê îdîyanê derheqê Bagdadîyî de twitter de wina nuştibi: "Çîyêko pîl qewimîyayo."

Selahîyetdarêko Îranij Reutersî rê îfade kerd ke welatê ey derheqê mergê Bagdadîyî de ame xeberdayene.

Ame dazanayene ke operasyon herêma Îdlib de hetê hêzanê taybetan ê Amerîka ra ame kerdene.

Fermandarê Pêroyî yê QSD'yî Mazlum Ebdîyî zî Twiterî ra mesajêk weşana û dimayê îdîayanê derheqê kiştişê Bagdadîyî de wina nuşt: "Operasyonêko tarîxî û serkewte bîyo ke netîceyê karêk o hempar ê îstîxbaratî yê bi DYA reyde bîyo."