Delegeyê Wezîrê Bazirganîya Teberî yê Fransa Franck Riesterî  roja sêşemeyî Meclîsê Neteweyî de cewabî dayî persan û vat ''Ewropa bîya yew û Konseya Yewîya Ewropa seba ke erjê xo bipawa  ganî seba vurnayîşê hemsencîya hêzî ya derheqê Tirkîya de biran bigêra.''

Riesterî rojnameyê Le Fiagroyî rê qisey kerd û vat: ''Rewşa nikayêne de a bira boykotî têna seba tay berheman mumkîn a.''

Riesterî heqaretê Erdoganî yê vera Macronî 'bi ziwanêkê tûjî şermezar kerd'.  Riesterî da zanayene ke ê pê qerardar ê ke vera terorê îslamî şer bikerê û vat: ''Ne Erdogan ne zî ê bînî nêeşkenê na xebata ma asteng bikerê. Îslamîstê sîyasîyî bi rayîrê manîpulasyonî xîret kenê ke qanûnê îslamî vejê verê qanûnê komare. No mumkîn nîyo. Ma do fikranê xo bipawê.''

Dima ke cîhadîstan 16ê teşrîna verêne de Fransa sereyê mamostayêkî tira kerd hukmatê Fransa vera îlsamîstanê radîkal-sîyasîyan tay tedbîrî girewtî. Serekkomarê Tirkîya Erdoganî zî Macron hedef kerd û pê heqaretan kerd. Erdoganî venga şarê xo da ke malanê Fransa boykot bikero. Çar partîyanê tirkan zî morê xo da binê vilaweka hempare û tewirê Macronî şermezar kerd.