Hetkarê Sekreterê Pêroyî yê Neteweyê Yewbîyayeyî (NY) Mark Lowrockî yo ke hetkarîya merdimî ra berpirsîyar o, eşkerayîye daye çapemenîye û ard ziwan, Somalî de nê des serran ra dima ziwayîya tewr girane yena ciwîyayene û Lowrockî vat, “Varişo ke menga Nîsane û Hezîrane de Somalî de vara û texmînê varişî yo ke do bivaro, 35 serran ra dima rayîrê ziwayîya tewr giran a bikero.” Lowrockî hîşyarîye daye ke no xo reyde Somalî rê xeterê vêşanîyêka girane do abikera.

Eşkerayîye de ame vatene, varişo ke menga Teşrîna Peyêne û Kanûne de vara, goreyê serranê verênan xeylî kêm bi û ame vatene, “Şaro ke verê cû zî kewtibi binê tesîrê ziwayîye, newe ra vernîya ci de xeterê vêşanîye û têşanîye esto û no zî înan vera nêweşîyanê giran ê ke rîskê mergî tede esto rê kena hesas.”

Eşkerayîya Hetkarê Sekreterê Pêroyî yê Neteweyê Yewbîyayeyî de ame vatene, ajansê hetkarîya merdiman ê Somalî nêeşkenê cewab bidê heme probleman. Goreyê eşkerayîye, Seba Somalî hewcedarîya Neteweyê Yewbîyayeyî ya bi 1 mîlyar û 90 mîlyon dolarî esta, la heta nika ney ra teyna se ra 22 ameyo peydakerdene. Pereyo ke Neteweyê Yewbîyayeyî bi hawayêko lezabez Somalî û Etîyopya rê bişawo nika 56 mîlyon dolar o û no pere zî 2,2 mîlyon merdimî rê bes nîyo.  Somalî de di ziwanîyanê girdan ê serranê 1992 û 2011 de 300 hezar merdimî ra zêdeyî kesî rîyê vêşanîye ra cuya xo vîndî kerdîbî.