Sekêşîya Têgêrayîşê Cinîyan ê Azadan (TJA) de cinîyî qezaya Silopî ya Şirnexî de semedê yewîya neteweyîye ameye têhet.

Çalakîya ke verê banê HDPyî ya Silopî de ameye kerdene Hemsereka Pêroyî yê DBPyî Salîha Aydenîz, parlamenterê HDPyî, Ayşe Acar Başaran, Fatma Kurtalan, Şevine Coşkun, Ayşe Surucu, Gulîstane Kiliç Koçyigit, Remzîye Tosun, Semra Guzel, Hasan Ozguneş, Vervatoxa TJA Ayşe Gokkan û xeylêk kesî tewrê ci bîyî.

Çalakîye de ame waştene ke ver bi Berê Sînorî yê Xabûrî rayraşîyayîş bêro kerdene la dormeyê banê partî pê TOMA û wesayîtanê zirxinan ame girewtene û destûr nêdîya. Nayî ser o kîtle verê banê partîye de  ame pêser û bi sloganan xoverdayîşê Îmrali û zîndanan selam kerd, xayînîye şermezar kerd û bale ante muhîmîya yewîya neteweyîye ser.

Dima eşkerayîye ameye dayene. Ayşe Gokkana ke tîya qisey kerd vat: '' Ma veng danê çar peçeyanê Kurdîstanî. Ma letekerişê Kurdîstanî qebul nêkenê. Gama ke Saddamî hêrişê Başûrê Kurdîstanî kerd Şirnex û Colemêrgî ra her kes bi pêşmergê û vera Saddamî mucadele kerd. Gama ke Qamişlo de qirkerdiş bi nîmêyê Nisêbînî semedê paştdayîşî şi. Gama ke DAÎŞî hêrişê Kobanê kerd, Kurdîstan de cinîyî bîyî yew û Kobanê de ameyî têhet. Ma ewro bi nê ruhî Silopî de ameyî têhet. Artêşê 60 welatan, artêşê NATO ameyî têhet la nêeşkayî DAÎŞî biqedenê. Cinîyê kurdan pê tîlîlîyan şîyî çeteyan ser. Înanê ke vatêne 'wa biciwîyê cinîyê kurdan' badê binfînayîşê DAÎŞî nê cinîyî sey îlegal îlan kerdî.''

Gokkane veng da heme serkêşanê kurdan û  wînda dewam kerd:  ''Yewîya kurdan azadîya kurdan a. 100 serrî verî gama ke Kurdîstan ame çar letekerdene, cinîyê kurdî bîyî 8 lete. Wa heme rayberê kurdan bizanê ke nê 8 leteyî bîyî yew. DAÎŞ şawit, vera qirkerdişanê Şingal, Efrîn, Mexmûr nê cinîyî ameyî têhet û şarê kurdî rê rehberîye kerde. Ganî heme rayberî semedê yewîya neteweyîye mucadeleyê cinîyan ê kurdan bivînê.''

Gokkane vist vîrî ke Rayberê Şarê Kurdî Abdullah Ocalanî badê 20 serran reya verêne gama ke pêvînayîşê telefonî kerd, veng da Mesûd Barzanîyî û vat: ''Ocalanî waşt ke wa Barzanî mîsyonê xo bîyaro ca. Kurdî her ca de wazenê ke bibê yew. Dem demê yewbîyayîşê kurdan o. Eke ma ewro mebê yew ma do vînî bikerê.

Gokkane bale ante hêrişanê vera kurdan ser û vat: ''Hemsereka KCDyî Leyla Guvena ke vera hêrişanê Efrînî vejîyayebî ameybî tepiştene û kewtbî grevê vêşanîye, ewro reyna ameye tepiştene û reyna xover dana. Vera Eyn Îsa û Mexmûrî hêrişê îşxalî dewam kenê. Ça de kurdêk/e vînî wazenê bifatisnê. Ma sey cinîyan nêwazenê ke destê înan tim ma ser o bo.'' Gokkane qiseykerdişê xo pê vatişê Cigerxwînî 'Eke mebê yew, ma do yew bi yew çîn bibê' qedîna.

Dima bi nameyê Meclîsê Mayanê Haştîye Nafîye Yigît qisey kerd. Yigîte vat: ''Pawitişê mayan oyo ke hetî destê xo bikerê binê kerra û verê rişnayîşê gonî bigêrê. Ma veng danê Mesûd Barzanîyî ke wa semedê yewîya neteweyîye rolê xo bîyaro ca.''